Дом наш, ласкаю сагрэты,
Продкаў мудрых запаветы,
Мова, спеўная надзіва,
Гэта ўсё мая Радзіма.
Гісторыя кожнага з нас пачынаецца з бацькоў і дзядоў. Неразрыўнымі ніцямі звязаны мы са сваім родам.
Як занатаваць памяць аб ім? Як перадаць тую нітку дзецям і ўнукам, каб не перарвалася? Менавіта такія пытанні ставіла перад сабой каманда праекта “З чыстага вытоку”, менавіта так разважалі мы, калі задумвалі наша мерапрыемства “Куток бацькоўскі”, асноўнай мэтай якога стала фарміраванне ў нашых падапечных каштоўнасных арыенціраў, гонару і павагі да традыцый, веры і культурнай спадчыны беларускага народа.
Мерапрыемству было наканавана вырашыць наступныя задачы:
-спрыяць папулярызацыі і захаванню гісторыка-культурнай спадчыны і традыцый Беларусі;
- спрыяць засваенню традыцыйных поглядаў на шлюб і сям'ю;
- выклікаць павагу да спадчыны сям'і, рода і народа;
- пазнаёміць прысутных з народнымі рамёствамі і назвамі прадметаў побыту беларусаў і іх ужываннем у штодзённым жыцці.
Мерапрыемства праходзіла на падставе Этнаграфічнай экспазіцыі “Беларуская хатка” гісторыка-этнаграфічнага музея каледжа.
Удзельнікі пазнавальнай экскурсіі ў мінулае прымалі ўдзел у інтэлектуальных гульнях, разгадвалі загадкі і рэбусы-галаваломкі.
Мы лічым, што менавіта такія мерапрыемствы абуджаюць у нашых выхаванцах цікавасць да культуры і побыту беларускага народа, спрыяюць выхаванню любові і павагі да сваёй сям'і, яе традыцый і веры, да малой і вялікай радзімы.
А гэта і ёсць тое самае галоўнае і неабходнае, што павінна пачынацца з дзяцінства, ў сям'і.
Чэрпайце і вы натхненне і падставы для нацыянальнага гонару з глыбінь чыстага вытоку традыцый патрыярхальнай сям'і беларускай і традыцый народа нашага.
